ઉભરતા કલાકારોને કલાયાત્રાના પ્રારંભિક તબક્કે પ્રોત્સાહન આપવા સાથે કલા સંવાદ, વિવેચન અને સર્જનાત્મક વિકાસ માટેનું નવું મંચ બન્યું સૂરત.
સૂરતમાં કલાના ક્ષેત્રે એક નવું મંચ ઊભું થઈ રહ્યું છે. ઉભરતા કલાકારોને તેમની કલાયાત્રાના પ્રારંભિક અને ઘડતરના તબક્કામાં સહયોગ આપવાના ઉદ્દેશ્ય સાથે ‘અલાયા સેન્ટર ફોર આર્ટ્સ’ની શરૂઆત કરવામાં આવી છે. આ કેન્દ્રનો હેતુ માત્ર કલાકારોને ઓળખ અને પોતાની કૃતિઓ પ્રદર્શિત કરવાની તક આપવા પૂરતો મર્યાદિત નથી, પરંતુ તેમની કલાપ્રવૃત્તિઓને સંદર્ભસભર વિવેચનાત્મક સંવાદ અને સતત વિકાસની તકો સાથે જોડવાનો પણ છે.
આ કલાકેન્દ્ર સ્થાનિક કલાપ્રવૃત્તિઓને વૈશ્વિક કલા જગતના વ્યાપક સંવાદ સાથે જોડવા ઇચ્છે છે. તેના દ્વારા કલાકારો પોતાના તત્કાલિન ભૌગોલિક સંદર્ભની બહાર વિસ્તરી શકે અને સાથે જ તેમની કલાપ્રવૃત્તિઓ જે સાંસ્કૃતિક તથા બૌદ્ધિક પરિસ્થિતિઓમાંથી ઉદ્ભવે છે, તેની સાથે જોડાયેલા રહી શકે. આ પહેલમાં ભારત અને યુનાઇટેડ કિંગડમના સમુદાયોનો સહયોગ રહ્યો છે.
અલાયા સેન્ટર ફોર આર્ટ્સ દ્વારા પ્રથમ સમૂહ કલા પ્રદર્શન ‘અલ્ટરિંગ એક્ટર્સ’ રજૂ કરવામાં આવી રહ્યું છે. આ પ્રદર્શન માનવીય અને અમાનવીય હસ્તક્ષેપો દ્વારા સ્થળો, ભૂદૃશ્યો, સંરચનાઓ, પર્યાવરણો અને વ્યવસ્થાઓ સતત કેવી રીતે આકાર પામે છે, તેની શોધ કરે છે. આ પરસ્પર સંબંધોમાં પરિવર્તન આવતાં સ્થળોને જોવાની, તેમાં વસવાની, તેનો અનુભવ કરવાની અને તેને સ્મૃતિમાં જાળવી રાખવાની રીતો પણ બદલાય છે. આ જ પ્રક્રિયાઓને કલાકારોએ પોતાની કૃતિઓ દ્વારા રજૂ કરી છે.
આ પ્રદર્શનમાં ચાર કલાકારો –
૧, અનુજ બાવલિયા (વડોદરા),
૨, ધૈવત શાહ (વડોદરા),
૩, હરમીત રિન (દિલ્હી) અને
૪, મહિમા વર્મા (બેંગલુરુ)ની
કૃતિઓ રજૂ કરવામાં આવી છે. તેમની કલાપ્રવૃત્તિઓ દ્વારા વિવિધ પ્રશ્નો, શોધ અને મુદ્દાઓને અલગ-અલગ દૃષ્ટિકોણથી રજૂ કરવામાં આવ્યા છે.
પ્રદર્શનની સાથે વિવિધ કાર્યક્રમો અને કાર્યશાળાઓનું પણ આયોજન કરવામાં આવ્યું છે. આ કાર્યક્રમો મુલાકાતીઓને કલાકારોની કલાપ્રવૃત્તિઓ તથા પ્રદર્શનના મૂળ વિચારને વધુ સારી રીતે સમજવામાં મદદરૂપ થશે. તેમાં આર્કિટેક્ટ રોબર્ટ સ્ટીફન્સ સાથે સંવાદ, પર્ફોર્મેટિવ વર્કશોપ, ‘ડ્રોઇંગ યોર ઓન સ્કેપ’ (પોતાનું દૃશ્યપટ દોરો) અને ફિલ્મ સ્ક્રીનિંગનો સમાવેશ થાય છે.
આ કલા પ્રદર્શનનું ઉદ્ઘાટન 24 ઑક્ટોબર, 2026ના રોજ સવારે 11 વાગ્યે થયું ત્યારથી 13 ડિસેમ્બર, 2026 સુધી મુલાકાતીઓ માટે ખુલ્લું રહેશે